Եվրախորհրդարանի սոցիալիստների և դեմոկրատների խումբը կոչ է արել կարճել Ադրբեջանում տնտեսագետ Գուբադ Իբադօղլուի և այլ քաղբանտարկյալների դեմ հարուցված քրեական գործը։
Հայտարարությունն ընդունվել է քաղաքական գործչի դստեր՝ Ջալա Բայրամովայի հետ պատվիրակության անդամների հանդիպումից հետո։
«Մենք մեր խորը մտահոգությունն ենք հայտնում պարոն Իբադօղլուի իրավիճակի վերաբերյալ, ով թափանցիկության և կոռուպցիայի դեմ պայքարի հավատարիմ պաշտպան է և անարդարացիորեն մեղադրվել է Ադրբեջանի իշխանությունների դեմ իր քննադատական ձայնը լռեցնելու փորձի մեջ»,- ասվում է հայտարարության մեջ։
Եվրախորհրդարանի պատգամավորները պահանջել են «անհապաղ և անվերապահորեն վերացնել Գուբադ Իբադօղլուին առաջադրված բոլոր մեղադրանքները, նրան լիովին ազատ արձակել, որպեսզի նա կարողանա ստանալ իրեն շտապ անհրաժեշտ բժշկական օգնությունը»։
«Նրա առողջական վիճակը պահանջում է շտապ բժշկական օգնություն։ Ադրբեջանի իշխանությունները պետք է թույլ տան պարոն Իբադօղլուին լքել երկիրը՝ արտերկրում բուժում ստանալու համար»,- ասվում է փաստաթղթում։
COP 29-ի նախօրեին փաստաթղթի հեղինակները կոչ են արել ԵՄ-ին, պետությունների ու կառավարությունների ղեկավարներին առաջին տեղում դնել մարդու իրավունքների խնդիրները։
«Մենք ևս մեկ անգամ կոչ ենք անում անհապաղ դադարեցնել ԵՄ-ի և Բաքվի միջև կնքված գազային գործընկերությունը, որն ուղղակիորեն հակասում է մեր կլիմայական հավակնություններին և հիմնարար սկզբունքներին»,- ասվում է հայտարարության մեջ։
Միաժամանակ կոչ է արվում Եվրախորհրդարանին՝ հոկտեմբերի 1-ին կայանալիք լիագումար նիստում ընդունել Եվրախորհրդարանի բանաձեւը, որի նպատակն է կտրականապես դատապարտել Ադրբեջանում այլախոհների նկատմամբ բռնաճնշումները։
«Մենք արդարություն ենք պահանջում Գուբադ Իբադօղլուի և բոլորի համար, ովքեր իրենց ազատությամբ վճարեցին Ադրբեջանում ժողովրդավարության համար իրենց պայքարի գինը»,- ընդգծվում է հայտարարության մեջ։
