Հոկտեմբերի 1-ի գիշերը Իսրայելի բանակը հատել է Լիբանանի սահմանը և սկսել «սահմանափակ ցամաքային գործողություն» Հեզբոլլահի դեմ։
«Իսրայելական բանակը գործողություններ է սկսել Հարավային Լիբանանում գտնվող Հեզբոլլահի ահաբեկչական օբյեկտների և ենթակառուցվածքների դեմ։ Այդ թիրախները գտնվում են սահմանի երկայնքով բնակելի թաղամասերում»,- հայտնել են իսրայելական բանակում։
Գրոհող ցամաքային զորքերին աջակցում են ավիացիան և հրետանին։ Գործողության ցամաքային փուլից առաջ իրականացվել են ինտենսիվ նախապատրաստական միջոցառումներ՝ ուղղված Հըզբոլլահի զինանոցի և հրամանատարների, այդ թվում՝ ահաբեկչական այս կազմակերպության գլխավոր քարտուղար Շեյխ Հասան Նասրուլլայի ոչնչացմանը։
Կեսգիշերից քիչ առաջ իսրայելական բանակը սկսել է ինտենսիվ հրետանային պատրաստություն։ Դրանից հետո արտասահմանյան լրատվամիջոցներում տեղեկություն է տարածվել, որ լիբանանյան բանակը թողել է իր դիրքերը սահմանին եւ նահանջել իր տարածքի խորքը։ Իսրայելական բանակի մամուլի ծառայության ներկայացուցիչը արաբերենով հորդորել է Հարավային Լիբանանի բնակիչներին գտնել անվտանգ վայրեր, իսկ Բեյրութի Դահիյա թաղամասի բնակիչներին՝ 500 մետր հեռանալ այն շենքերից, որոնք «Հեզբոլլահը» կարող է օգտագործել ահաբեկչական նպատակներով։
Մոտ կես ժամ անց տեղեկություններ եղան, որ Դահիային առնվազն 10 հարված է հասցվել։
Հարձակման է ենթարկվել նաև Այն ալ-Հիլվեյը` Լիբանանում պաղեստինցի փախստականների ամենամեծ ճամբարը, որը գտնվում է Սիդոն (Սաիդա) քաղաքի մոտակայքում: Քիչ անց Reuters գործակալությունը գրել է, որ թիրախը եղել է Ֆաթհի տեղական մասնաճյուղի ղեկավար Մունիր Մաքդան (Մունիր Մագդա): Նրա ճակատագիրն առայժմ անհայտ է։
Հոկտեմբերի 1-ի գիշերը Պենտագոնի ղեկավար Լլոյդ Օսթինը զրույց է ունեցել իր իսրայելցի գործընկեր Յոավ Գալանտի հետ։ Ամերիկյան վարչակազմի տվյալներով՝ «կողմերը պայմանավորվել են հյուսիսային սահմանի վրա հարձակման ենթակառուցվածքի ապամոնտաժման անհրաժեշտության մասին՝ Հեզբոլլահի հարձակումները կանխելու համար»։
Ըստ Axios-ի՝ Լիբանանում գործողությունը սահմանափակ է լինելու թե՛ ժամանակային, թե՛ ծավալների առումով։ Գործողությունը չի ներառում Լիբանանի հարավային շրջանների օկուպացումը։ Թե որքան խորությամբ է բանակը մտադիր դուրս գալ սահմանից, տեղեկություններ չկան։
