Ադրբեջանական «Ազել» հեռուստակայքի հիմնադիր Աֆղան Սադիգովն արդեն 12 օր է, ինչ հացադուլ է անում Վրաստանի մեկուսարանում։ Նա պահանջում է կասեցնել Ադրբեջանին արտահանձնման գործընթացը և դադարեցնել անհիմն քրեական հետապնդումը։
«Այսօր փաստաբան Ռուսուդան Մչեդլիշվիլին նախնական կալանքի կենտրոնում հանդիպել է Աֆղանի հետ։ Նա շատ գունատ տեսք ուներ։ Փաստաբանը նշել է Աֆղանիի անհապաղ հոսպիտալացման կարևորությունը»,- Turan-ին ասել է լրագրողի կինը՝ Սևինջ Սադիղովան։
Հոկտեմբերի 1-ին Սադիգովան հեռախոսով խոսել է ամուսնու հետ։ Նա ասաց, որ շատ է թուլացել, իրեն ոչ մի բուժօգնություն չի ցուցաբերվում։ «Սակայն ճնշումը չափում են օրական երկու անգամ»,- ասել է Սադիգովան։
Իր հերթին փաստաբան Մչեդլիշվիլին Turan-ին հայտնել է, որ Սադիգովին հանդիպել է հոկտեմբերի 2-ին կալանավայրում։ «Աֆղան Սադիգովը հացադուլի մեջ է սեպտեմբերի 21-ից։ Այսօր տեսա, որ նա վատ վիճակում է, չի կարողանում նորմալ քայլել։ Նրա կոնցենտրացիան խախտված է, և նա բավականին նիհարել է»,- ասաց փաստաբանը։
Փաստաբանի խոսքով՝ պաշտպանական կողմը միջնորդելու է Սադիգովին տեղափոխել քրեակատարողական հիմնարկի բժշկական կենտրոն։ «Հուսով եմ՝ կանեն։ Քանի որ Աֆղան Սադիգովի վիճակը լավ չէ, նա բժշկական հսկողության ու օգնության կարիք ունի»,- ասել է փաստաբանը։
Բացի այդ, պաշտպանական կողմը կբողոքարկի Սադիգովին Վրաստանում քաղաքական ապաստան տրամադրելու մերժման որոշումը։
*Աֆղան Սադիգովը, վախենալով հետապնդումներից, 2023 թվականի դեկտեմբերին ընտանիքի հետ մեկնել է Վրաստան։ Հուլիսի կեսերին նրան Վրաստանից չթողեցին Թուրքիա գնալ և ասացին, որ կարող է գնալ միայն Ադրբեջան։
Օգոստոսին Սադիգովը ձերբակալվել էր Ադրբեջանից արտահանձնման խնդրանքով։ Բաքվում նրան մեղադրում են սպառնալիքների միջոցով պահանջելու մեջ։
Սադիգովը հերքում է մեղադրանքները։ Ադրբեջանում նրան երկու անգամ դատել են։ Իրավապաշտպան կազմակերպությունները նրան ամեն անգամ ճանաչել են որպես քաղբանտարկյալ։ Նա հացադուլ է հայտարարել սեպտեմբերի 21-ից՝ ի նշան բողոքի իր ձերբակալության և ապաստանի մերժման դեմ։
