Ադրբեջանի փոխվարչապետ Շահին Մուստաֆաևը Իրան կատարած այցի շրջանակներում հոկտեմբերի 15-ին հանդիպել է Իրանի արտաքին գործերի նախարար Սեյիդ Աբբաս Արաղչիի հետ։
ԻՌՆԱ գործակալության հաղորդման համաձայն, Արաքչին հայտարարել է, որ Իրանը դեմ է Կովկասում օտար երկրների միջամտությանը և ընդգծել է տարածաշրջանի երկրների հնարավորությունների, այդ թվում՝ 3+3 խորհրդակցությունների մեխանիզմի օգտագործման անհրաժեշտությունը։
Արաքչին մատնանշեց Իսրայելի գործողությունները «Պաղեստինի և Լիբանանի խոցելի ժողովրդի» դեմ՝ արևմտյան որոշ երկրների աջակցությամբ, և կարևորեց գլոբալ քայլեր ձեռնարկել դա դադարեցնելու համար։
Մուստաֆաևը օգտակար և կառուցողական է գնահատել երկու երկրների միջև համագործակցությունը առևտրի, ներդրումների, տարանցման, էլեկտրաէներգիայի, ջրի և նավթի ոլորտներում։
Նա նշել է, որ Բաքուն աջակցում է տարածաշրջանում խաղաղության հաստատմանը։ Նա նաեւ նշել է, որ «Ադրբեջանը երբեք թույլ չի տա իր երկրի տարածքից հարձակում իր հարեւանների դեմ»։
Այցի շրջանակներում Մուստաֆաևը հանդիպել է Իրանի նախագահ Մասուդ Պեզեշկիանի, նավթի նախարար Մոհսին Փաքնեջադի, ճանապարհների և քաղաքաշինության նախարար Ֆարզանա Սադիքի, էկոնոմիկայի նախարար Աբդունասիր Հիմմաթիի հետ։
Աբդուննասիր Հիմաթին ասել է, որ Ադրբեջանի և Իրանի միջև ապրանքաշրջանառությունը մոտ 400 միլիոն դոլար է, ինչը շատ ցածր ցուցանիշ է, երբ կան բարենպաստ հնարավորություններ առևտրատնտեսական հարաբերությունների ընդլայնման համար։
«Քննարկումներ են տեղի ունեցել փողի և բանկային համակարգի դերի վերաբերյալ առևտրի ծավալների մեծացման գործում, և ադրբեջանական կողմը խոստացել է հետաքննել այդ հարցը»,- ասել է Հիմաթին։
Ճանապարհների և քաղաքաշինության նախարար Սադիքլըն անդրադարձել է Իրանի Ռեշտ-Աստարա երկաթուղու շինարարության մեկնարկին և ասել, որ այս հարցը շրջադարձային է Հյուսիս-Հարավ միջանցքի զարգացման համար։ Ադրբեջանի կառավարության համագործակցությունը շատ կարևոր է դեպի այս երթուղի տանող երկաթուղային ենթակառուցվածքի զարգացման համար։
Նա նաև նշել է երկու երկրների միջև համատեղ թռիչքների ավելացման կարևորությունը։
Շահին Մուստաֆաեւի հանդիպումների մասին ադրբեջանական կողմը դեռ պաշտոնական տեղեկություն չի հրապարակել։