ԱՄՆ-ը երկուշաբթի օրը հայտարարել է, որ Հյուսիսային Կորեայի զորքեր ուղարկելը Ուկրաինա՝ պատերազմում Ռուսաստանի կողմից կռվելու համար վտանգավոր իրադարձություն է։
«Մենք չենք կարող հաստատել՝ տեղեկատվությունը ճշմարիտ է, թե ոչ, բայց եթե այն համապատասխանում է իրականությանը, ապա դա վտանգավոր և չափազանց անհանգստացնող զարգացում է Ուկրաինայի դեմ Ռուսաստանի պատերազմում»,- ճեպազրույցում ասել է Պետդեպարտամենտի մամուլի քարտուղարի տեղակալ Վեդանտ Պատելը:
Հանգստյան օրերին և՛ Ուկրաինան, և՛ Հարավային Կորեան, վկայակոչելով հետախուզական տվյալները, հայտարարեցին, որ Հյուսիսային Կորեան հազարավոր զինվորներ է ուղարկել Ուկրաինա՝ Ռուսաստանին աջակցելու համար:
Պատելի խոսքով, սա ցույց է տալիս նաև «Ռուսաստանի աճող հուսահատությունը. Ուկրաինական զինուժի մարտունակության շնորհիվ Ռուսաստանն ամեն օր հսկայական կորուստներ է կրում։ «Եթե Ռուսաստանն իսկապես ստիպված է եղել դիմել Կորեայի Ժողովրդադեմոկրատական Հանրապետությանը աշխատուժի համար, ապա դա միանշանակ Կրեմլի հուսահատության նշան է»,- ասել է նա։
