Եվրախորհրդարանի սոցիալ-դեմոկրատների և կանաչների խմբերը կոչ են արել անհապաղ ազատ արձակել Գուբադ Իբադօղլուին և Ադրբեջանի բոլոր քաղբանտարկյալներին Բաքվում կայանալիք COP29 կլիմայական գագաթնաժողովի նախօրեին։ Սոցիալ-դեմոկրատները «X» սոցիալական ցանցում տարածած հայտարարության մեջ Ադրբեջանին կոչ են արել կարգավորել մարդու իրավունքների վատթարացող իրավիճակը նոյեմբերին նախատեսված համաժողովից առաջ։
«Մենք կոչ ենք անում Ադրբեջանի իշխանություններին անհապաղ ազատ արձակել Գուբադ Իբադօղլուին և մյուս բոլոր քաղբանտարկյալներին», – ասել է խմբավորումը։ Նրանք ընդգծել են, որ Եվրամիության և Ադրբեջանի միջև ցանկացած համաձայնագիր պետք է կախված լինի մարդու իրավունքների հարգումից և Հայաստանի հետ խաղաղ գործընթացում առաջընթացից։ Հայտարարության մեջ նաև կոչ է արվում Եվրամիությանը կասեցնել Ադրբեջանի հետ գազային համաձայնագիրը, քանի դեռ այդ պայմանները չեն կատարվել:
Կանաչների խումբը նաև հայտարարություն է տարածել ԶԼՄ-ներում՝ պահանջելով ազատ արձակել Իբադօղլուին։ Իբադօղլուն հայտնի տնտեսագետ է և Ադրբեջանի պետական նավթագազային արդյունաբերության գլխավոր քննադատը և ներկայումս գտնվում է տնային կալանքի տակ: Խումբը նրան առաջադրել է մտքի ազատության Սախարովի անվան մրցանակի։
Եվրախորհրդարանի պատգամավոր և Ադրբեջանի հարցով ստվերային զեկուցող Սերգեյ Լագոդինսկին մեղադրել է Ադրբեջանի կառավարությանը հանածո վառելիքի եկամուտներից կախվածության և ընդդիմության դեմ ճնշումների մեջ։ «Ադրբեջանում ընդդիմադիր ակտիվիստների, լրագրողների և իրավապաշտպանների վիճակը աղետալի է»,- ասել է նա՝ ուշադրություն հրավիրելով ՄԱԿ-ի կլիմայի համաժողովից առաջ քաղաքացիական հասարակության վրա ճնշումների վրա։
Կանաչների խմբի մեկ այլ անդամ՝ Եվրախորհրդարանի պատգամավոր Մարկետա Գրեգորովան, կրկնելով այս կոչերը, կոչ արեց ԵՄ պատվիրակությանը, որը կմասնակցի COP29-ին, դատապարտել Ադրբեջանում մարդու իրավունքների իրավիճակը։ «Մենք պետք է ճանաչենք և աջակցենք ադրբեջանական ընդդիմության պայքարը մինչև Բաքվում կայանալիք COP29 համաժողովը»,- հավելել է նա։
Բանաձեւի քվեարկությունը տեղի կունենա հինգշաբթի՝ հոկտեմբերի 24-ին։ Նույն օրը կայանալիք լիագումար նիստում կհրապարակվի 2024 թվականի Սախարովի անվան մրցանակ շնորհելու մասին որոշումը։
