«Ազադլըգ» ռադիոյի նախագահ Սթիվեն Կապուսը կոչ է արել ազատ արձակել լրագրող, տնտեսագետ Ֆարիդ Մեհրալիզադեին։
«Այսօր (հոկտեմբերի 30-ին) հինգ ամիս է անցել «Ազադլըգ» ռադիոյի լրագրող, տնտեսագետ Ֆարիդ Մեհրալիզադեի անարդարացի ձերբակալությունից։ Մենք խորապես մտահոգված ենք, որ նա շարունակում է մնալ բանտում՝ կեղծ մեղադրանքներով։ Մենք կոչ ենք անում անհապաղ ազատ արձակել նրան, որպեսզի նա կարողանա տուն վերադառնալ կնոջ և նորածին դստեր մոտ»,- ասել է Կապուսը։
Մեհրալիզադեն ձերբակալվել էր հունիսի 1-ին՝ մաքսանենգության մեղադրանքով։ Ավելի ուշ նրան մեղադրեցին տնտեսական այլ հանցագործությունների մեջ։
Սեպտեմբերի 6-ին Մեհրալիզադեի ազատազրկման ժամկետը երկարացվել է մինչև դեկտեմբերի 19-ը։
Նա հերքում է մեղադրանքները և դրանք համարում է շինծու։ Իրավապաշտպանները Ֆարիդ Մեհրալիզադեին քաղբանտարկյալ են ճանաչել։
