xeberman.com Նոյեմբերի 4-ին գաղութում հացադուլ հայտարարած կայքի հիմնադիր Փոլադ Ասլանովին այդ օրը երեկոյան բռնի ուժով տեղափոխել են քրեակատարողական ծառայության բուժհաստատություն։ Այս մասին Turan-ին հայտնել է նրա կինը՝ Գյուլմիրա Ասլանովան։
Ասլանովը հացադուլ հայտարարելուց հետո կնոջը հրավիրել են գաղութ, ասել են, որ հացադուլն անիմաստ է, քանի որ դատավճիռը բողոքարկելու հնարավորությունները սպառվել են, և ներում չի սպասվում։ Ուստի քաղցը կվնասի արդեն 49 կիլոգրամ կշռող Ասլանովի առողջությանը։
«Մեզ թույլ տվեցին զրուցել Փոլադի հետ, բայց նա ասաց, որ կշարունակի հացադուլը, քանի որ անարդար դատավճռի դեմ բողոքելու այլ տարբերակ չկա»,- ասել է Ասլանովան։ Նրա հեռանալուց հետո Ասլանովը տեղափոխվել է քրեակատարողական ծառայության բուժհաստատություն։
«Մենք բազմիցս խնդրել ենք Փոլադին հոսպիտալացնել երիկամների ու ատամների հետ կապված լուրջ խնդիրների, նյարդային համակարգի խանգարումների, անքնության պատճառով, սակայն նրանք մերժել են։ Հիմա հանկարծ որոշել են նրան հոսպիտալացնել»,- ասել է Ասլանովան։
* xeberman.com Կայքի ղեկավար Փոլադ Ասլանովը ձերբակալվել է 2019 թվականի հունիսի 12-ին՝ Իրանի օգտին լրտեսության մեղադրանքով (Քրեական օրենսգրքի 274-րդ հոդված՝ պետական դավաճանություն)։ Նա դատապարտվել է 16 տարվա ազատազրկման։
Ասլանովը հերքել է բոլոր մեղադրանքները և ասել, որ իրեն հետապնդում են հատուկ ծառայությունների աշխատակիցների շրջանում կոռուպցիոն փաստերը բացահայտելու համար։
Իրավապաշտպանները նրան ճանաչել են որպես քաղբանտարկյալ։ Միջազգային կազմակերպությունները դատապարտել են Ասլանովի ձերբակալությունը և կոչ արել ազատ արձակել նրան։ Ավելի ուշ Գերագույն դատարանը Փոլադ Ասլանովի ազատազրկման պատիժը նվազեցրեց մինչև 13 տարի։
