Ռուսաստանի պաշտպանության նախարարության տեղեկությունը, որ սեպտեմբերի 17 -ին Շուշիի շրջանում երկու հայ զինծառայող է վիրավորվել` ադրբեջանական բանակի ստորաբաժանումների հրետակոծության հետևանքով, զարմանալի և ափսոսալի է, ասել է Ադրբեջանի ՊՆ մամուլի ծառայության ներկայացուցիչ Անար Էյվազովը:
Ռուսաստանի պաշտպանական գերատեսչությունը նախօրեին էր հայտնել Շուշի քաղաքի մոտակայքում հայկական զինված կազմավորումների դիրքերի գնդակոծման մասին:
«Միջադեպը հետաքննվել է Ադրբեջանի Հանրապետության ՊՆ ներկայացուցիչների և Ռուսաստանի Դաշնության խաղաղապահ կոնտինգենտի ղեկավարության մասնակցությամբ: Պարզվել է, որ ադրբեջանական բանակի ստորաբաժանումները կրակ չեն բացել այդ ուղղությամբ նշված ժամանակահատվածում: Այնուամենայնիվ, հետագայում երկու կողմերի մասնակցությամբ ուսումնասիրված տեղեկատվությունը ներկայացվել է բոլորովին այլ ձևով»,- ասել է ադրբեջանական ՊՆ-ի ներկայացուցիչը:
Ըստ ռուսական կողմի հաղորդման` սեպտեմբերի 17-ին «Շուշայի շրջանում արձանագրվել է Լեռնային Ղարաբաղի զինված կազմավորումների պոստերի երեք գնդակոծում»։ Հայկական կողմի տեղեկատվությամբ՝ կրակը վարվել է Ադրբեջանի Հանրապետության զինված ուժերի դիրքերից:
