Անցած տարի Ադրբեջանում հետիոտներին վրաերթի 649 դեպք է գրանցվել։
Toplum TV-ն հայտնում է, որ հունվարի 22-ին այս մասին տեղեկություն է տարածել Պետական ճանապարհային ոստիկանության գլխավոր վարչությունը։
Հաղորդվել է, որ հետիոտնի միջադեպերի ժամանակ զոհվել է 358, վիրավորվել՝ 333 մարդ։
Սա ընդհանուր ճանապարհատրանսպորտային պատահարների 39,7 տոկոսն է։ Հետիոտների վրաերթի հետևանքով պատահարների բացարձակ մեծամասնությունը տեղի է ունեցել մթության կամ սահմանափակ տեսանելիության պայմաններում։
«Այս վիճակագրության ձևավորման վրա ազդում են վարորդների անփութությունը, ճանապարհի անբավարար լուսավորությունը և այլ գործոններ, ինչպես նաև ուղղակիորեն հետիոտների կողմից ճանապարհային երթևեկության կանոնների անտեսումը և նրանց կյանքի ու առողջության նկատմամբ անտարբեր վերաբերմունքը»,- նշվում է պաշտոնական տեղեկատվության մեջ։ .
Նշվել է նաև, որ նախորդ տարի ճանապարհատրանսպորտային պատահարների հետևանքով զոհվել է 591, վիրավորվել՝ 718 մարդ։
