Ինչպե՞ս է Եվրամիությունը գնահատում Ադրբեջանում լրագրողների և քաղաքական ակտիվիստների ձերբակալությունների վերաբերյալ վերջին փաստերը։ Եվրոպական միության արտաքին քաղաքականության և անվտանգության քաղաքականության ծառայության խոսնակ Փիթեր Ստանոն «Ամերիկայի ձայն» ռադիոկայանի ադրբեջանական ծառայության այս հարցին պատասխանել է.
«Խոսքի ազատությունը և անկախ լրատվամիջոցները համամարդկային արժեքներ են, որոնք կիրառելի են ամենուր և բոլորի համար։ Ադրբեջանում մարդու իրավունքների ոլորտում տիրող իրավիճակը և անկախ զանգվածային լրատվության միջոցների իրավիճակը շարունակում են մտահոգիչ մնալ, որը մենք բազմիցս բարձրաձայնել ենք մեր ադրբեջանցի գործընկերների առջև։
Մենք օգտագործում ենք բոլոր հնարավորությունները՝ կոչ անելու Ադրբեջանին կատարել իր ներքին և միջազգային պարտավորությունները՝ կապված ԶԼՄ-ների ազատության և մարդու իրավունքների հետ։ Այս մասին մենք նշել ենք 2023 թվականի դեկտեմբերի 21-ի մեր հայտարարության մեջ։
Մարդու իրավունքները և օրենքի գերակայության նկատմամբ հարգանքը կազմում են Ադրբեջանի հետ Եվրամիության հարաբերությունների հիմքը։ ԵՄ-ն կարծում է, որ հիմնարար իրավունքների հարգանքը, ներառյալ արդար դատաքննության և պատշաճ գործընթացի իրավունքը, կարևոր է կայունության և բարգավաճման համար:
ԵՄ-ն կշարունակի մասնակցել բոլոր ֆորումներին, որտեղ հնարավորություն կա բարձրացնելու Ադրբեջանում մարդու իրավունքների իրավիճակի զարգացման հետ կապված հարցեր, ներառյալ մարդու իրավունքների շուրջ ԵՄ-Ադրբեջան ամենամյա երկխոսությունը:
Թուրան
