Մերձմոսկովյան Սերպուխով քաղաքում գտնվող կանացի մենաստանում այսօր վաղ առավոտյան տեղի ունեցած պայթյունի հետևանքով 12 մարդ տարբեր աստիճանի վնասվածքներ է ստացել։ Այս մասին ՏԱՍՍ-ին փոխանցել են հատուկ ծառայություններին մոտ կանգնած աղբյուրները՝ նշելով, որ միջադեպի պատճառը ինքնաշեն պայթուցիկ սարքի գործարկումն էր։
Իրավապահների տեղեկություններով, մենաստանին կից գործող ծխական դպրոցի նախկին աշակերտներից մեկը փորձել է ահաբեկչական հարձակում իրականացնել առավոտյան պատարագի ընթացքում, սակայն ինքնաշեն սարքը նախատեսվածից վաղ է պայթել։
Նույն աղբյուրի փոխանցմամբ, պայթյունի հետևանքով ահաբեկչության 15-ամյա հեղինակը ծանր վիրավորում է ստացել և մահացել մինչև բժիշկների ժամանելը։
