«Խորապես ափսոսում եմ Ադրբեջանի իշխանությունների՝ Եվրոպայի խորհրդի Խոշտանգումների և անմարդկային կամ արժանապատվությունը նվաստացնող վերաբերմունքի կոմիտեի (CPT) հետ համագործակցելուց հրաժարվելու համար, որը հանգեցրեց ԽԿԿ ծրագրված այցի չեղարկմանը։ ԽԿԿ-ի՝ Ադրբեջան կատարած հատուկ այցի վերաբերյալ զեկույցի արդյունքները նույնպես անհանգստացրին ինձ»,-ասված է ԵԽԽՎ նախագահ Թեոդոր Ռուսոպուլոսի հուլիսի 3-ին տարածած հայտարարության մեջ։
«Ուզում եմ ընդգծել, որ Մարդու իրավունքների եվրոպական կոնվենցիայի 3-րդ հոդվածը սահմանում է ժողովրդավարական հասարակության ամենահիմնարար արժեքներից մեկը։ Իրոք, խոշտանգումների, անմարդկային և նվաստացուցիչ վերաբերմունքի և պատժի արգելքը, որը կապված է մարդու արժանապատվության հարգման հետ, բացարձակ է և դրանից ոչ մի շեղում ընդունելի չէ։ Հետևաբար, կարևոր է շարունակել բաց և արդյունավետ համագործակցությունը ԽԿԿ-ի հետ՝ ապահովելու դրա իրականացումը և կանխելու կալանավորների նկատմամբ խոշտանգումների կամ դաժան վերաբերմունքի ցանկացած ձև:
Ես կոչ եմ անում Ադրբեջանի իշխանություններին վերանայել իրենց որոշումները և անհապաղ վերսկսել համագործակցությունն ու կառուցողական երկխոսությունը ԽԿԿ-ի հետ։ Դա կծառայի ոչ միայն ԵԽ-ի հետ ընդհանուր հարաբերությունների բարելավմանը, այլեւ Ադրբեջանի քաղաքացիների հիմնարար շահերին։
Մեր վեհաժողովը լիովին հավատարիմ է շարունակելու երկխոսությունը Ադրբեջանի խորհրդարանի և կառավարության հետ՝ լուծելու բոլոր չլուծված խնդիրները։
Ես համոզված եմ, որ Ադրբեջանի և նրա ժողովրդի շահերից է բխում սերտ և արդյունավետ համագործակցությունը Եվրոպայի խորհրդի բոլոր ինստիտուտների հետ և օգուտ քաղել այս համագործակցությունից՝ որպես մեր անդամ երկրներից մեկը»,- ասել է ԵԽԽՎ նախագահը։