Ռուսաստանը մտահոգված է, որ Հայաստանում Եվրամիության առաքելությունը կարող է մշտական կարգավիճակ ստանալ. Այս մասին հայտարարել է ՌԴ փոխարտգործնախարար Միխայիլ Գալուզինը։
Հայաստանի խորհրդարանը մարտին վավերացրել է Ադրբեջանի հետ սահմանին Եվրամիության առաքելության կարգավիճակի մասին համաձայնագիրը։ Համաձայնագիրը դիտորդներին շնորհում է անձեռնմխելիություն և արտոնություններ, այդ թվում՝ անձեռնմխելիություն կալանավորումից և ձերբակալությունից:
Այս տարվա ապրիլին Գալուզինը նշել էր, որ Եվրամիության առաքելության կազմում ընդգրկված են Կանադայի ներկայացուցիչներ։ Նրա խոսքով, դա ցույց է տալիս, որ ՆԱՏՕ-ն ներթափանցել է Հարավային Կովկաս։ Ռուսական կողմը մտավախություն ունի, որ Եվրամիության առաքելության գործունեությունը կկենտրոնանա ռուսական օբյեկտների և Հայաստանի հարևան պետությունների՝ Իրանի և Թուրքիայի վերաբերյալ հետախուզական տեղեկատվության հավաքագրման վրա։
«Մենք բացասական ենք գնահատում Հայաստանում Եվրամիության առաքելության գործունեությունը, մենք բազմիցս հայտարարել ենք այդ մասին։ Եվրամիության խնդիրը հայտնի է, և դա տարածաշրջանում ամրապնդվելն է՝ վնասելով հարավկովկասյան պետությունների ավանդական գործընկերների և հարևանների՝ Ռուսաստանի, Իրանի և Թուրքիայի շահերին»,- ասել է Գալուզինը։
Ռուսաստանը բազմիցս արտահայտել է իր բացասական վերաբերմունքը Հայաստանում Եվրամիության առաքելության նկատմամբ և ընդգծել, որ չի կանխել իրավիճակի սրումը հայ-ադրբեջանական սահմանին։
Ռուսաստանը վստահ է, որ Հարավային Կովկասում կայուն խաղաղության կարելի է հասնել միայն Ռուսաստանի, Ադրբեջանի և Հայաստանի ղեկավարների կողմից 2020-2022 թվականներին ձեռք բերված եռակողմ պայմանավորվածությունների իրականացման միջոցով։
Եվրոպական միության երկարաժամկետ առաքելությունը Հայաստանում տեղակայվել է 2023 թվականի փետրվարի 20-ին 2 տարի ժամկետով և ի սկզբանե բաղկացած է եղել 100 հոգուց։ 2023 թվականի դեկտեմբերին Եվրամիությունը հայտարարեց, որ առաքելությունը հասցվել է 209 հոգու։
