Նախկին դիվանագետ Էմին Շայգ Իբրահիմովին մեղադրանք է առաջադրվել Քրեական օրենսգրքի 126.2.4 (դիտավորությամբ բերանի խոռոչի առողջությանը վնասելը խուլիգանությամբ) և 221. (խուլիգանություն) հոդվածներով։ Այս մասին ֆեյսբուքյան իր էջում գրել է փաստաբան Ագիլ Լայջը։
«Էմինը դեպքը նկարագրում է այսպես՝ երբ գնում էր իր տուն՝ մետրոյի «Ժողովուրդների բարեկամություն» կայարանի մոտ գտնվող իր բնակարանը վերանորոգելու, անծանոթը հարձակվել է նրա վրա ու սկսել պատռել նրա շորերը։ Վայրկյաններ անցնելուն պես նրան բերման են ենթարկել քաղաքացիական հագուստով ոստիկանները և տարել ոստիկանության Նիզամիի շրջանային վարչության 24-րդ բաժին։ Ինքն էլ նշում է, որ իրեն հետապնդել են, և նշված «հանցագործությունը» հորինված է և կապված է իր քննադատական դիրքի հետ»,- նկատեց փաստաբանը։
Նրա խոսքով՝ առաջիկա մի քանի ժամում Իբրահիմովին կտեղափոխեն Բաքվի Նիզամիի շրջանային դատարան։
Էմին Իբրահիմովը ձերբակալվել է հուլիսի 22-ին։
Ներքին գործերի նախարարության մամուլի ծառայությունից հայտնել են, որ Իբրահիմովը ձերբակալվել է դանակահարության համար։
2002 թվականին Էմին Իբրահիմովն ավարտել է Բաքվի պետական համալսարանի միջազգային հարաբերությունների ֆակուլտետը։ 2005 թվականին Անկարայի համալսարանում ստացել է միջազգային հարաբերությունների մագիստրոսի կոչում։ 2009 թվականին ավարտել է ՆԱՏՕ-ի պաշտպանական քոլեջի բարձրագույն կուրսը։
Նա դիվանագիտական ծառայության մեջ է եղել 2007-2020թթ.
2012-2016 թվականներին եղել է ԱՄՆ-ում Ադրբեջանի դեսպանատան երկրորդ քարտուղարը, իսկ 2016-2020 թվականներին՝ Ուրուգվայի գործերի ժամանակավոր հավատարմատարը։
Նա հրաժարական տվեց դիվանագիտական ծառայությունից՝ ի նշան բողոքի 2020 թվականի խորհրդարանական ընտրությունների կեղծման դեմ։ Դրանից հետո նա զբաղվել է վերլուծական աշխատանքով, մեկնաբանություններ արել ԶԼՄ-ներում ու սոցիալական ցանցերում։
Նա սուր քննադատության է ենթարկել իշխանություններին Արևմուտքի հետ հարաբերությունների վատթարացման և Ռուսաստանի և այլ ավտորիտար պետությունների հետ մերձեցման համար։
2023 թվականի սեպտեմբերին Էմին Իբրահիմովը 30 օրով վարչականորեն կալանավորվեց «Քաղաքականությունը խաղում է Ռուսաստանի ձեռքում» հոդվածը հրապարակելու համար։
