Երեւանը չի տեսնում Բաքվի քաղաքական կամքը՝ ստորագրելու խաղաղության համաձայնագրի համաձայնեցված մասը, իսկ «Արեւմտյան Ադրբեջանի» մասին խոսակցությունները Հայաստանի նկատմամբ տարածքային պահանջների տպավորություն են ստեղծում։ Այս մասին չորեքշաբթի օրը Վարշավայի անվտանգության ֆորումում ունեցած ելույթի ժամանակ ասաց արտգործնախարար Արարատ Միրզոյանը։
«Մենք տեսնում ենք, որ ադրբեջանական կողմը չի ցանկանում ստորագրել համաձայնագիրը՝ նոր պահանջներ դնելով… Ասում են, որ փաստաթղթի նախագծի բոլոր կետերը պետք է համաձայնեցվեն։ Բայց աշխարհում չկա այնպիսի պայմանագիր, որը կկարգավորեր կողմերի միջեւ առկա բոլոր խնդիրները։ Մենք առաջարկում ենք ստորագրել այս փաստաթուղթը, ապա բանակցել այլ հարցերի շուրջ»,- Միրզոյանի խոսքերն է մեջբերում Sputnik Արմենիան։
Միրզոյանի խոսքով, Հայաստանում և հայ հասարակության մեջ մտահոգություն կա Հայաստանի տարածքներում Ադրբեջանի ապագա ծրագրերի վերաբերյալ։
«Այսօր ադրբեջանական կողմը խոսում է «Արեւմտյան Ադրբեջանի» մասին, որը, ըստ նրանց, ընդգրկում է Հայաստանի գրեթե ողջ տարածքը։ Ասում են, որ դրանք տարածքային պահանջներ չեն, բայց տպավորությունը լրիվ հակառակն է»,- ասաց նախարարը։
Միրզոյանը հույս ունի, որ Բաքվում կայանալիք COP29 կլիմայական գագաթնաժողովը կարող է նպաստել խաղաղ գործընթացին։ Նա հիշեցրել է, որ Հայաստանն աջակցել է Ադրբեջանին Բաքվում այս գագաթնաժողովն անցկացնելու հարցում։
