«Վրաստանի իրավունքներ» իրավապաշտպան կազմակերպությունն իր մտահոգությունն է հայտնել սեպտեմբերի 21-ից կալանավայրում հացադուլի մեջ գտնվող ադրբեջանական «Ազել» հեռուստաընկերության ղեկավար Աֆղան Սադիգովի առողջական վիճակի կապակցությամբ։
Հոկտեմբերի 2-ին և 3-ին Աֆղան Սադիգովին կալանավայրում հանդիպել են «Վրաստանի իրավունքներ» կազմակերպության փաստաբանները։ Նրանք ուշադրություն են դարձրել Սադիգովի առողջական վիճակի վատթարացմանը։ Փաստաբանների խոսքով՝ նրա համար դժվար է շարժվել, խոսել ու կենտրոնանալ։
Այդ կապակցությամբ «Վրաստանի իրավունքներ» կազմակերպությունը դիմել է Քրեակատարողական ծառայությանը և խնդրել Աֆղան Սադիգովին տեղափոխել համապատասխան բուժհաստատություն։
Աֆղան Սադիգովի վիճակի մասին տեղեկացվել է Վրաստանի օմբուդսմենը։
* Աֆղան Սադիգովը, վախենալով հետապնդումներից, 2023 թվականի դեկտեմբերին ընտանիքի հետ մեկնել է Վրաստան։ Հուլիսին Վրաստանից չթողեցին գնալ Թուրքիա, ասացին, որ կարող է գնալ միայն Ադրբեջան։
Նա ձերբակալվել էր օգոստոսին՝ Ադրբեջանի պահանջով։ Բաքվում նրան մեղադրում են սպառնալիքների միջոցով շորթման մեջ եւ պահանջում են արտահանձնել։ Աֆղան Սադիգովը հացադուլի մեջ է սեպտեմբերի 21-ից՝ բողոքելով իր ձերբակալության և ապաստան տրամադրելուց հրաժարվելու դեմ։
