Չորեքշաբթի օրը Միացյալ Նահանգները կտրականապես հերքել է այն տեղեկությունը, թե Բայդենի վարչակազմը դեմ է Ուկրաինայի ՆԱՏՕ-ին անդամակցելու հեռանկարներին:
«Այս հաղորդումները չեն համապատասխանում իրականությանը», – չորեքշաբթի ճեպազրույցում ասել է Պետքարտուղարության խոսնակ Մեթյու Միլլերը Turan-ի Վաշինգտոնի թղթակցին։
«Դուք լսել եք, որ ինքը՝ ԱՄՆ նախագահը, ինչպես նաև պետքարտուղարը, բազմիցս ասել են, որ Ուկրաինան դառնալու է ՆԱՏՕ-ի անդամ»,- ասել է Միլլերը։
Մինչ այդ Foreign Policy ամսագիրը, հղում անելով իր աղբյուրներին, հայտնել էր, որ Վաշինգտոնը Գերմանիայի հետ միասին փորձում է երկարացնել ՆԱՏՕ-ին Ուկրաինայի անդամակցության գործընթացը։
Միլլերի մեկնաբանություններն արվել են ՆԱՏՕ-ի գլխավոր քարտուղար Յենս Ստոլտենբերգի՝ այս շաբաթ ԱՄՆ մայրաքաղաք կատարած այցի ժամանակ։ Նա ասել է, որ աջակցությունն Ուկրաինային և ՆԱՏՕ-ի վերազինմանը անքակտելիորեն կապված են և նպաստում են Միացյալ Նահանգների և նրա դաշնակիցների ազգային անվտանգությանը։
Պուտինի պատերազմը միայն Ուկրաինան վերահսկելու համար չէ, չորեքշաբթի օրը Վաշինգտոնում ունեցած ելույթում ասել է Սթոլթենբերգը։ «Ռուսաստանը փորձում է ընդլայնել իր ազդեցության գոտին՝ ձևավորելու այլընտրանքային աշխարհակարգ, որտեղ ԱՄՆ-ի հզորությունը կրճատվում է, ՆԱՏՕ-ն մասնատվում է, իսկ փոքր ժողովրդավարությունները ծնկի են բերվում»,- ասել է նա։
Չորեքշաբթի օրը Կիև այցելած պետքարտուղարի տեղակալ Վիկտորյա Նուլանդը պաշտպանել է այս գաղափարը։ Նա Ուկրաինայի ղեկավարության հետ քննարկել է իրավիճակը ռազմաճակատում, Ուկրաինային գլոբալ օգնությունը շարունակելու կարևորությունը»,- ասել է Մեթյու Միլլերը։
Կիևում լրատվամիջոցների հետ զրույցում Նուլանդը վստահություն է հայտնել, որ 2024 թվականը «հաջողություն» կբերի ուկրաինացիներին մարտի դաշտում։
«Պարոն Պուտինին մարտի դաշտում հաճելի անակնկալներ են սպասվում, իսկ այս տարի Ուկրաինան շատ հաջողակ կլինի»,- ասել է նա։
