Եվրախորհրդարանի ընդունած բանաձեւն անհիմն է եւ ակնհայտորեն խեղաթյուրում է Ադրբեջանում մարդու իրավունքների վիճակը։
Այս մասին ասել է Ադրբեջանի արտաքին գործերի նախարարության պաշտոնական ներկայացուցիչ Այխան Հաջիզադեն՝ մեկնաբանելով Եվրախորհրդարանի 2024 թվականի ապրիլի 25-ի բանաձևը, որը կոչ է անում պատժամիջոցներ սահմանել Ադրբեջանի պաշտոնյաների նկատմամբ՝ մարդու իրավունքները խախտելու համար։
«Այդ քայլը ոչ այլ ինչ է, քան Եվրոպայում մի շարք ուժերի բացահայտ քաղաքական պատվեր՝ ուղղված Ադրբեջանի հետ հարաբերությունների վատթարացմանը»,- կարծում է Հաջիզադեն։
«Եվրախորհրդարանի որոշ խմբի անդամներ, առաջնորդվելով սեփական ներքին նկատառումներով և անձնական շահերով, պարզապես քարոզում են Ադրբեջանում իրավիճակի խեղաթյուրված պատկերը»,- ասել է ԱԳՆ ներկայացուցիչը։
Ադրբեջանի դեմ պատժամիջոցներ կիրառելու կոչերը «միայն բարդացնում են Ադրբեջանի և Եվրամիության հարաբերությունները»։
«Մենք Եվրախորհրդարանին ևս մեկ անգամ կոչ ենք անում դադարեցնել միջամտությունը Ադրբեջանի ներքին գործերին և դատական գործընթացներին»,- ասել է Հաջիզադեն։